മകളെ കൊലപ്പെടുത്തി ആത്മഹത്യ ചെയ്ത വിപഞ്ചിക കേസിൽ ഭർത്താവും കുടുംബവും പ്രതികൾ; കുണ്ടറ പൊലീസ് കേസെടുത്തു
ഷാർജയിൽ ഒന്നരവയസുകാരിയായ മകളെ കൊലപ്പെടുത്തി മലയാളി യുവതി വിപഞ്ചിക ജീവനൊടുക്കിയ സംഭവത്തിൽ ഭർത്താവിനെയും കുടുംബത്തെയും പ്രതികളാക്കി കുണ്ടറ പൊലീസ് കേസെടുത്തു. ആത്മഹത്യയ്ക്ക് പ്രേരിപ്പിച്ചെന്ന കുറ്റത്തിന് ഭർത്താവ് നിധീഷ്, അദ്ദേഹത്തിന്റെ സഹോദരി, ഭര്‍തൃപിതാവ് എന്നിവരിലാണ് കേസ് രജിസ്റ്റര്‍ ചെയ്തത്. ഇവർ ഇപ്പോള്‍ ഷാര്‍ജയിലാണ്, നാട്ടില്‍ തിരിച്ചെത്തിയശേഷമേ അറസ്റ്റ് നടക്കുകയുള്ളൂ.
വിവാഹത്തിന് സ്ത്രീധനം വാങ്ങിയതിന്റെ അടിസ്ഥാനത്തിൽ സ്ത്രീധന നിരോധന നിയമ പ്രകാരവും ഇവർക്കെതിരെ കേസ് എടുത്തിട്ടുണ്ട്. സ്ത്രീധനത്തിന്റെ പേരിൽ മാനസിക പീഡനം നടത്തിയെന്നും എഫ്‌ഐആറില്‍ വ്യക്തമാക്കുന്നു. വി‌പഞ്ചികയുടെ അമ്മ ശൈലജയുടെ പരാതിയിലാണ് പൊലീസ് നടപടി സ്വീകരിച്ചത്.
വിവാഹത്തിനുശേഷം മകള്‍ പലതരത്തിലുള്ള പീഡനങ്ങൾ നേരിട്ടിരുന്നു എന്നും നിറത്തെ അവഹേളിച്ച് സഹോദരി മുടി മൊട്ടയടിച്ചുവെന്നും ശൈലജയുടെ മൊഴിയില്‍ പറയപ്പെടുന്നു. മകളുടെ ആത്മഹത്യയ്ക്ക് പിന്നിൽ ഈ തുടര്‍ച്ചയായ പീഡനങ്ങളാണെന്ന് ശൈലജ പൊലീസിന് പറഞ്ഞു. ആത്മഹത്യാകുറിപ്പും പീഡനത്തെക്കുറിച്ചുള്ള ഡിജിറ്റല്‍ തെളിവുകളും പൊലീസ് ശേഖരിച്ചിട്ടുണ്ട്.
വിദേശകാര്യ മന്ത്രിയ്ക്കും കേരള മുഖ്യമന്ത്രിയ്ക്കും ശൈലജ പരാതി നല്‍കിയിരുന്നു. വിപഞ്ചികയുടെയും മകളുടെയും മൃതദേഹം നാട്ടിലെത്തിച്ച ശേഷം റീ പോസ്റ്റ്‌മോര്‍ട്ടം വേണമെന്നും കേസ് സിബിഐക്ക് കൈമാറണമെന്നുമാണ് ശൈലജയുടെ ആവശ്യം. എന്നാൽ, കുട്ടിയുടെ മൃതദേഹം നാട്ടിലേക്ക് അയക്കില്ലെന്ന നിലപാടിലാണ് ഭർത്താവ് നിധീഷ്.
Tag: Husband and family accused in Vipanchika case of daughter’s murder and suicide; Kundara police register case