ഗൂഗിളിന്‍റെ ജെമിനി ആപ്പിൽ ഇനി ചിത്രങ്ങളെ വീഡിയോകളാക്കി മാറ്റാം
ഗൂഗിൾ അവരുടെ ജെമിനി ആപ്പിൽ വീഡിയോ ജനറേഷൻ സവിശേഷതകൾ അവതരിപ്പിച്ചു. ഏറ്റവും പുതിയ വീഡിയോ ജനറേഷൻ മോഡലായ Veo 3 ഉപയോഗിച്ച് സ്റ്റിൽ ഫോട്ടോകളെ ആനിമേറ്റഡ് വീഡിയോ ക്ലിപ്പുകളാക്കി മാറ്റാൻ ഈ സവിശേഷത ഉപയോക്താക്കളെ അനുവദിക്കും. തിരഞ്ഞെടുത്ത രാജ്യങ്ങളിലെ ഗൂഗിൾ എഐ പ്രോ, അൾട്രാ സബ്‌സ്‌ക്രൈബർമാർക്ക് ജൂലൈ 11 മുതൽ ഈ അപ്‌ഡേറ്റ് ലഭ്യമാകാൻ തുടങ്ങി.
ഒരു ബ്ലോഗ് പോസ്റ്റിലൂടെ ജെമിനി ആപ്പിൽ ഈ സവിശേഷതയുടെ ലഭ്യമാകുമെന്ന് ഗൂഗിൾ പ്രഖ്യാപിച്ചു. ഈ പുതിയ സവിശേഷതയിലൂടെ ഗൂഗിൾ എഐ അൾട്രാ, ഗൂഗിൾ എഐ പ്രോ പ്ലാൻ ഉപയോക്താക്കൾക്ക് പ്രതിദിനം എട്ട് സെക്കൻഡ് വീതമുള്ള മൂന്ന് വീഡിയോ ക്ലിപ്പുകൾ സൃഷ്ടിക്കാൻ കഴിയും. ഇതൊരു പണമടച്ചുള്ള സേവനമാണ്. ഇതിനായി നിങ്ങൾ എല്ലാ മാസവും കുറഞ്ഞത് 1950 രൂപ ചെലവഴിക്കേണ്ടിവരും. ഈ വീഡിയോ ക്ലിപ്പുകൾ ഓഡിയോയോടൊപ്പമായിരിക്കും. കൂടാതെ ജെമിനി ആപ്പിൽ നിന്നും നേരിട്ട് സൃഷ്‍ടിക്കാനും കഴിയും. നിങ്ങൾക്ക് ദൈനംദിന വസ്തുക്കളെ ആനിമേറ്റ് ചെയ്യാനും നിങ്ങളുടെ ഡ്രോയിംഗുകൾക്കും പെയിന്‍റിംഗുകൾക്കും ജീവൻ നൽകാനും അല്ലെങ്കിൽ പ്രകൃതി ദൃശ്യങ്ങൾക്ക് ചലനം നൽകാനും ഈ സവിശേഷതയിലൂടെ കഴിയും എന്ന് ഗൂഗിൾ പറഞ്ഞു.
ഈ സവിശേഷത ഉപയോഗിക്കാൻ ജെമിനി ആപ്പ് തുറന്ന് പ്രോംപ്റ്റ് ബോക്സിലെ ടൂൾബാറിൽ നിന്ന് വീഡിയോകൾ എന്ന ഓപ്ഷൻ തിരഞ്ഞെടുക്കുക. തുടർന്ന് നിങ്ങളുടെ ഫോട്ടോ ഗാലറിയിൽ നിന്ന് ഒരു ചിത്രം തിരഞ്ഞെടുക്കുക. ആ ഇമേജിനെ അടിസ്ഥാനമാക്കി ഒരു വീഡിയോ സൃഷ്ടിക്കാൻ ജെമിനിക്ക് വിശദമായ നിർദ്ദേശങ്ങൾ നൽകുക. അതായത് ഏത് തരത്തിലുള്ള ആനിമേഷൻ ആവശ്യമാണ്, പശ്ചാത്തലം എന്തായിരിക്കണം, ഓഡിയോ എന്തായിരിക്കണം തുടങ്ങിയ കാര്യങ്ങൾ വ്യക്തമാക്കുക. ഏതാനും മിനിറ്റുകൾക്കുള്ളിൽ ജെമിനി ആ നിശ്ചല ചിത്രത്തെ ഒരു ചലനാത്മക വീഡിയോയാക്കി മാറ്റും.