ജാനകി വേഴ്സസ് സ്റ്റേറ്റ് ഓഫ് കേരള വിവാദം; രണ്ടര മിനിറ്റിനിടെ ആറ് ഭാഗങ്ങളിൽ മ്യൂട്ട്
ഏറെ വിവാദമായ സുരേഷ് ഗോപി ചിത്രം ജാനകി വേഴ്സസ് സ്റ്റേറ്റ് ഓഫ് കേരള എന്ന ചിത്രത്തിന്റെ പുതുക്കിയ പതിപ്പ് സെന്സര് ബോര്ഡിന് സമര്പ്പിച്ചു. കോടതിയില് വിചാരണ നടക്കുന്ന ഭാഗത്ത് അനുപമ പരമേശ്വരൻ അവതരിപ്പിക്കുന്ന കഥാപാത്രമായ ജാനകി വിയെ പേരെടുത്ത് വിളിക്കുന്ന ഭാഗമാണ് മ്യൂട്ട് ചെയ്തിട്ടുള്ളത്. രണ്ടര മിനിറ്റിനിടെ ആറ് ഭാഗങ്ങളിലാണ് ഇത്തരത്തില് മ്യൂട്ട് ചെയ്തിട്ടുള്ളത്. എന്നാൽ, തുടര്ച്ചയായി ഈ രീതിയിൽ ‘ജാനകി’ എന്ന പേര് മ്യൂട്ട് ചെയ്തത് സിനിമയെ ബാധിക്കുമെന്നാണ് ചിത്രത്തിന്റെ അണിയറ പ്രവര്ത്തകര് പറയുന്നത്. ചിത്രത്തിന്റെ സബ് ടൈറ്റിലും മാറ്റം വരുത്തി ജാനകി വി വേഴ്സസ് സ്റ്റേറ്റ് ഓഫ് കേരള എന്നാണ് മാറ്റിയിരിക്കുന്നത്.
ചിത്രത്തില് കേന്ദ്ര കഥാപാത്രത്തിന്റെ പേര് ജാനകി എന്ന് ഉപയോഗിക്കരുത്. പകരം കഥാപാത്രത്തിന്റെ മുഴുവന് പേരായ ജാനകി വിദ്യാധരന് എന്നോ ജാനകി വി എന്നോ ഉപയോഗിക്കണം എന്നായിരുന്നു സെന്സര് ബോര്ഡ് നിര്ദേശിച്ചത്. മാത്രമല്ല, ജാനകിയുടെ പേര് ഉപയോഗിക്കുന്ന കോടതി രംഗത്തിലെ ഒരു സംഭാഷണം മാറ്റുകയോ മ്യൂട്ട് ചെയ്യുകയോ വേണമെന്നും സെന്സര് ബോര്ഡ് നിര്ദേശിച്ചിരുന്നു. ഇതിനെതിരെ ചിത്രത്തിന്റെ നിര്മാതാക്കള് കോടതിയെ സമീപിച്ചു.
ഇതനുസരിച്ച് 96 ഓളം ഭാഗങ്ങളിലും കട്ട് വേണ്ടിവരുമെന്നും നിര്മാതാക്കള് അറിയിച്ചു. ഇതോടെയാണ് ടൈറ്റിലില് വി എന്ന് ചേര്ത്താല് മതിയാകുമെന്ന് സെന്സര് ബോര്ഡ് വ്യക്തമാക്കിയത്. കോടതി രംഗങ്ങളില് പേര് ഉപയോഗിക്കുന്ന ഭാഗം മ്യൂട്ട് ചെയ്താല് മതിയെന്നും സെന്സര് ബോര്ഡ് അംഗങ്ങള് ചൂണ്ടിക്കാട്ടിയിരുന്നു. ഇതോടെ ചിത്രത്തിന്റെ പേര് മാറ്റാന് തയ്യാറാണെന്ന് നിര്മാതാക്കള് കോടതിയെ അറിയിക്കുകയായിരുന്നു.
Tag: Janaki vs State of Kerala controversy; Six parts muted in two and a half minutes