സംസ്ഥാനത്ത് ഇന്ന് അതി തീവ്ര മഴക്ക് സാധ്യത; രണ്ട് ജില്ലകളിൽ റെഡ് അലർട്

തിരുവനന്തപുരം: കേരളത്തിൽ ഇന്ന് അതിതീവ്ര മഴയ്ക്ക് സാധ്യതയുണ്ടെന്ന് കേന്ദ്ര കാലാവസ്ഥാ വകുപ്പ് മുന്നറിയിപ്പ് നൽകി. കണ്ണൂർ, കാസർകോട് ജില്ലകളിൽ റെഡ് അലർട്ട് പ്രഖ്യാപിച്ചിരിക്കുകയാണ്. പത്തനംതിട്ട, കോട്ടയം, ഇടുക്കി, എറണാകുളം, തൃശ്ശൂർ, പാലക്കാട്, മലപ്പുറം, കോഴിക്കോട്, വയനാട് ജില്ലകളിൽ യെല്ലോ അലേർട്ട് നിലവിലുണ്ട്. അടുത്ത ദിവസങ്ങളിലും അതിതീവ്ര മഴയും ശക്തമായ കാറ്റിനും ഉയർന്ന തിരമാല ഉണ്ടാകാനും സാധ്യതയുള്ളതായാണ് കാലാവസ്ഥാ പ്രവചനം. തീരദേശ മേഖലകളിൽ ശക്തമായ കടലാക്രമണവും സാധ്യതയുള്ളതിനാൽ 17 വരെ കേരള-കർണാടക തീരങ്ങളിൽ മത്സ്യബന്ധനത്തിന് നിരോധനമാണ്. വടക്കൻ കർണാടക, തെലങ്കാന, റായലസീമ പ്രദേശങ്ങളുടെ മുകളിലായി നിലനിൽക്കുന്ന ചക്രവാതച്ചുഴിയും, കേരളത്തിന്റെ മുകളിലൂടെ തുടരുന്ന ശക്തമായ പടിഞ്ഞാറൻ കാറ്റുമാണ് മഴ കനക്കാൻ കാരണം.