മുഖ്യമന്ത്രിയെ കൺവിൻസിങ് സ്റ്റാറാക്കി കുഴൽനാടൻ്റെ പോസ്റ്റ്
മുഖ്യമന്ത്രി പിണറായി വിജയനെ പരിഹസിച്ച്‌ കോണ്‍ഗ്രസ് നേതാവ് മാത്യു കുഴല്‍നാടന്റെ ഫേസ്ബുക്ക് പോസ്റ്റ്. മുഖ്യമന്ത്രി ‘കണ്‍വിൻസിങ് സ്റ്റാർ’ എന്നാണ് പരിഹാസം. മുഖ്യമന്ത്രിയും കെ രാധാകൃഷ്ണൻ എംപിയുമായുളള ചിത്രവും മുഖ്യമന്ത്രിയും മോദിയുമുളള ചിത്രവുമാണ് കുഴല്‍നാടൻ പോസ്റ്റിനൊപ്പം പങ്കുവെച്ചത്. ഇതിനൊപ്പം സമീപകാലത്ത് സോഷ്യല്‍ മീഡിയയില്‍ ഹിറ്റായ ‘കണ്‍വിൻസിങ് സ്റ്റാർ ‘ സുരേഷ് കൃഷ്ണയുടെ ഫോട്ടോയും പങ്കുവെച്ചിട്ടുണ്ട്.
‘നിങ്ങള്‍ ഡല്‍ഹിയില്‍ പോയി ഉന്നത പദവി വഹിക്ക്, ഞാൻ അവനെ മുഖ്യമന്ത്രിയാക്കിയിട്ട് വരാം’ എന്ന അടിക്കുറിപ്പ് കെ രാധാകൃഷ്ണന് ഒപ്പമുളള ചിത്രത്തിലും, നിങ്ങള്‍ ഇഡിയെ കൈകാര്യം ചെയ്യ്, ഞാൻ പോയി തൃശ്ശൂർ ശരിയാക്കിയിട്ട് വരാം എന്ന അടിക്കുറിപ്പ് പ്രധാനമന്ത്രിക്ക് ഒപ്പമുളള ചിത്രത്തിനും നല്‍കിയാണ് കുഴല്‍നാടന്റെ ട്രോള്‍. തൃശ്ശൂർ സീറ്റ് ബിജെപിയുമായുളള ധാരണയുടെ ഭാഗമാണെന്നും കെ രാധാകൃഷ്ണനെ മന്ത്രിസഭയില്‍ നിന്നും മാറ്റി എംപിയാക്കിയത് മുഖ്യമന്ത്രി സ്ഥാനത്തേക്ക് വരാതിരിക്കാൻ വേണ്ടിയാണെന്നുമാണ് ട്രോളിലൂടെ കുഴല്‍നാടൻ വിമർശിക്കുന്നത്.