രാഹുൽ ഗാന്ധിയുടെ ആരോപണങ്ങൾ അടിസ്ഥാന രഹിതം; പൊതുജനത്തിന് ഓൺലൈനായി വോട്ടുകൾ നീക്കം ചെയ്യൽ അസാധ്യം;തെര. കമ്മീഷൻ
ന്യൂഡല്ഹി: വോട്ടുകൊള്ള ആരോപണം ഉന്നയിച്ച രാഹുല് ഗാന്ധിക്ക് മറുപടിയുമായി തെരഞ്ഞെടുപ്പ് കമ്മീഷന്. ലോക്സഭാ പ്രതിപക്ഷ നേതാവ് ഉന്നയിച്ച എല്ലാ ആരോപണങ്ങളും തെറ്റാണെന്നും അടിസ്ഥാന രഹിതമാണെന്നും തെരഞ്ഞെടുപ്പ് കമ്മീഷന്.രാഹുൽ ഗാന്ധി പറഞ്ഞത് പോലെ പൊതുജനങ്ങൾക്ക് ആർക്കും തന്നെ ഓൺലൈനായി വോട്ട് ഒഴിവാക്കാനാവില്ലെന്നും തെരഞ്ഞെടുപ്പ് കമ്മീഷൻ വ്യക്തമാക്കി. വോട്ട് നീക്കം ചെയ്യുന്നതിന് മുമ്പ് ആ വ്യക്തിയുടെ ഭാഗം കേള്ക്കും. ഇതാണ് നടപടി എന്നും കമ്മിഷന് പ്രസ്താവനയില് അറിയിച്ചു.
എന്നാല് 2023-ല് അലന്ദ് നിയമസഭാ മണ്ഡലത്തില് വോട്ടുകള് നീക്കം ചെയ്യാന് ചില ശ്രമങ്ങള് നടന്നിരുന്നു.ക്രമക്കേടുകൾ കമ്മീഷന്റെ ശ്രദ്ധയിൽപ്പെട്ടിരുന്നുവെന്നും പക്ഷേ ആ നീക്കം ഫലപ്രദമായില്ലെന്നും കൃത്യമായി അതിനെ തടഞ്ഞിരുന്നെന്നും കമ്മീഷൻ വ്യക്തമാക്കി. ഈ വിഷയം തെരഞ്ഞെടുപ്പ് കമ്മിഷന് പരിശോധിച്ചു എഫ്ഐആര് ഫയല് ചെയ്യുകയും ചെയ്തിട്ടുണ്ടെന്നും തെരഞ്ഞെടുപ്പ് കമ്മീഷന് പ്രസ്താവനയില് അറിയിച്ചു. 2023-ൽ കോൺഗ്രസാണ് അലന്ദിൽ വിജയിച്ചതെന്നും തെരഞ്ഞെടുപ്പ് കമ്മീഷൻ കൂട്ടിച്ചേർത്തു.
കര്ണാടകത്തിലെ ഒരു മണ്ഡലം ഉദാഹരിച്ചായിരുന്നു രാഹുല് ഗാന്ധി ഇത്തവണ വോട്ട് ഡിലീറ്റേഷന് ആക്ഷേപം ഉന്നയിച്ചത്. 2023ലെ നിയമസഭാ തെരഞ്ഞെടുപ്പില് കര്ണാടകയിലെ അലന്ത് നിയമസഭാ മണ്ഡലത്തില് വോട്ടര് പട്ടികയില് നിന്ന് പേര് വെട്ടാന് നീക്കങ്ങൾ നടത്തി 6018 വോട്ടുകളാണ് വെട്ടാന് ശ്രമിച്ചത്. സംസ്ഥാനത്തിന് പുറത്തുനിന്നുള്ള വ്യാജ ലോഗിൻ വഴിയാണ് ഇത് നടക്കുന്നതെന്നും ഈ വോട്ടു കൊള്ളയ്ക്ക് മുഖ്യ തെരഞ്ഞെടുപ്പ് കമ്മീഷണര് ഗ്യാനേഷ് കുമാര് സംരക്ഷണം നല്കുന്നതായും രാഹുൽ ആരോപിച്ചു. കർണ്ണാടകത്തിന് പുറത്ത് നിന്നുള്ള കോൾ സെൻ്ററുകൾ വഴിയാണ് വോട്ടുകൾ ഒഴിവാക്കുന്നത്. ഇതിന് ഗ്യാനേഷ് കുമാർ മറുപടി പറയണം. കർണ്ണാടക പൊലീസ് കേസെടുക്കുകയും വിവരങ്ങൾ തേടി സർക്കാർ 18 കത്തുകൾ തെരെഞ്ഞെടുപ്പ് കമ്മീഷന് നൽകി. എന്നാൽ വിവരങ്ങൾ നൽകാൻ കമ്മീഷൻ തയ്യാറാകുന്നില്ല. ഒടിപി വിവരങ്ങളുടേതടക്കം വിശദാംശങ്ങൾ തേടിയിട്ടുണ്ടെന്നും രാഹുൽ ഗാന്ധി വ്യക്തമാക്കി. ഡല്ഹിയിലെ എഐസിസി ആസ്ഥാനത്ത് നടത്തിയ വാര്ത്താസമ്മേളനത്തിലാണ് രാഹുല് ഗാന്ധിയുടെ പരാമര്ശങ്ങള്.