ആര്‍സിബി ഐപിഎല്‍ വിജയാഘോഷ പരിപാടിക്കിടെ ആളുകൾ മരിക്കാനിടയായ സംഭവം; നിഖില്‍ സൊസാലെയ്ക്ക് ജാമ്യം
റോയല്‍ ചലഞ്ചേഴ്‌സ് ബെംഗളുരു (ആര്‍സിബി) ഐപിഎല്‍ കിരീടം നേടിയതിനെ തുടർന്ന് നടന്ന വിജയാഘോഷ പരിപാടിക്കിടെ ആളുകൾ മരിക്കാനിടയായ കേസിൽ അറസ്റ്റിലായിരുന്ന ആര്‍സിബിയിലെ മുതിര്‍ന്ന ഉദ്യോഗസ്ഥൻ നിഖില്‍ സൊസാലെയ്ക്ക് ജാമ്യം. കര്‍ണാടക ഹൈക്കോടതിയാണ് ഇടക്കാല ജാമ്യം അനുവദിച്ചത്. വിജയാഘോഷത്തിന്റെ ചുമതല ഏറ്റെടുത്തിരുന്ന ഇവന്റ് മാനേജ്മെന്റ് സ്ഥാപനമായ ഡിഎന്‍എ നെറ്റ്വര്‍കിലെ രണ്ട് ഉദ്യോഗസ്ഥര്‍ക്കും ജാമ്യം ലഭിച്ചിട്ടുള്ളതായാണ് വിവരം.
ആര്‍സിബി) ഐപിഎല്‍ കിരീടം നേടിയതിനെ തുടർന്ന് നടന്ന വിജയാഘോഷ പരിപാടിക്കിടെ തിക്കിലും തിരക്കിലുംപെട്ട് 11 പേര്‍ മരിക്കുകയും നിരവധി പേര്‍ക്ക് പരിക്കേല്‍ക്കുകും ചെയ്തിരുന്നു. ജൂണ്‍ നാലിനായിരുന്നു അപകടം നടന്നത്. സംഭവം നടന്ന് രണ്ട് ദിവസത്തിന് ശേഷം, ജൂണ്‍ ആറിനായിരുന്നു പ്രത്യേക അന്വേഷണ സംഘം നിഖില്‍ സൊസാലെയെ അറസ്റ്റ് ചെയ്തത്. സൊസാലെയുടേത് അടക്കം മൂന്ന് പേരുടെയും പാസ്‌പോര്‍ട്ടുകള്‍ കോടതിയില്‍ സമര്‍പ്പിക്കണമെന്നതടക്കമുള്ള കര്‍ശന വ്യവസ്ഥകളോടെയാണ് കര്‍ണാടക ഹൈക്കോടതി ജാമ്യം അനുവദിച്ചിരിക്കുന്നത്.