സ്കൂൾ വിദ്യാർഥിനിയെ പീഡിപ്പിക്കാൻ ശ്രമിച്ച കേസിൽ പ്രതി പിടിയിൽ
മലപ്പുറം: നിലമ്പൂരില് സ്കൂള് വിദ്യാർത്ഥിനിയെ തട്ടിക്കൊണ്ടു പോയി പീഡിപ്പിക്കാൻ ശ്രമിച്ചയാള് അറസ്റ്റില്. അകമ്പാടം എരഞ്ഞിമങ്ങാട് സ്വദേശി നിഷാദ് ആണ് പിടിയിലായത്. നാലു മാസം മുമ്പ് നടന്ന സംഭവത്തിലാണ് നിലമ്പൂർ പൊലീസ് ഇയാളെ പിടികൂടിയത്. സ്കൂളില് നിന്നും വീട്ടിലേക്ക് മടങ്ങുകയായിരുന്ന പത്താം ക്ലാസ് വിദ്യാർത്ഥിനിയെയാണ് ഇയാള് പീഡിപ്പിക്കാൻ ശ്രമിച്ചത്.
ഇക്കഴിഞ്ഞ ജൂണ് 19നാണ് കേസിന് ആസ്പദമായ സംഭവം നടന്നത്. തനിച്ച് നടന്നു പോവുകയായിരുന്ന പെണ്കുട്ടിയെ പിന്തുടർന്ന പ്രതി, എരഞ്ഞിമങ്ങാട് ഫോറസ്റ്റ് ഓഫീസിനു സമീപം എത്തിയപ്പോള് ബലം പ്രയോഗിച്ച് പെണ്കുട്ടിയുടെ ഷാള് കൊണ്ട് കൈകള് പിറകിലേക്ക് കെട്ടി തൊട്ടടുത്ത കുറ്റിക്കാട്ടിലേക്ക് പിടിച്ച് വലിച്ച് കൊണ്ട് പോയി പീഡിപ്പിക്കാൻ ശ്രമിക്കുകയായിരുന്നു.
പെണ്കുട്ടിയുടെ നിലവിളി കേട്ട് ആളുകള് വരുന്നത് കണ്ട ഇയാള് കുട്ടിയെ ഉപേക്ഷിച്ച് കാട്ടില് ഓടി ഒളിച്ചു. പെണ്കുട്ടിയുടെ മൊഴി പ്രകാരം കേസ് രജിസ്റ്റർ ചെയ്ത പൊലീസ് ഏറെ പണിപെട്ടാണ് പ്രതിയിലേക്കെത്തിയത്. പ്രതി നിഷാദിനെ പെണ്കുട്ടി പിന്നീട് തിരിച്ചറിഞ്ഞു. ഇതോടെ നിഷാദ് കുറ്റം സമ്മതിക്കുകയും ചെയ്തു.