കൊച്ചിയില് നടി ആക്രമിക്കപ്പെട്ട കേസില് മുന് ഡിജിപി ആര് ശ്രീലേഖക്ക് നോട്ടീസ്
കൊച്ചി: കൊച്ചിയില് നടി ആക്രമിക്കപ്പെട്ട കേസില് മുന് ഡിജിപി ആര് ശ്രീലേഖക്ക് നോട്ടീസ്. അതിജീവിത നല്കിയ കോടതിയലക്ഷ്യ ഹര്ജിയിലാണ് ശ്രീലേഖക്ക് വിചാരണ കോടതി നോട്ടീസ് അയച്ചത്. കേസിലെ പ്രതിയും നടനുമായ ദിലീപിന് അനുകൂലമായി ആര് ശ്രീലേഖ നടത്തിയ പരാമര്ശത്തിനെതിരെ കോടതിയലക്ഷ്യ നടപടി സ്വീകരിക്കണമെന്നായിരുന്നു അതിജീവിത ആവശ്യപ്പെട്ടത്.
തന്റെ യൂട്യൂബ് ചാനലിലും ചില ഓണ്ലൈന് ചാനലുകള്ക്ക് നല്കിയ അഭിമുഖങ്ങളിലും ദിലീപിന് അനുകൂലമായ നിലപാട് ആര് ശ്രീലേഖ സ്വീകരിച്ചിരുന്നു. കേസില് ദിലീപ് നിരപരാധിയാണെന്നും നടനെതിരെ തെളിവുകള് കെട്ടിച്ചമച്ചതാണെന്നുമായിരുന്നു ശ്രീലേഖയുടെ ആരോപണം. ദിലീപിന്റെ കാര്യത്തില് മുഖ്യമന്ത്രി ഉള്പ്പെടെയുള്ളവരോട് കാര്യങ്ങള് ബോധിപ്പിച്ചിരുന്നുവെന്നും നടിയെ ആക്രമിച്ച കേസ് ഉടനൊന്നും തീരില്ലെന്നും ശ്രീലേഖ പറഞ്ഞിരുന്നു. സംഭവം ശ്രദ്ധയില്പ്പെട്ടതോടെയാണ് ശ്രീലേഖയ്ക്കെതിരെ അതിജീവിത വിചാരണകോടയില് കോടതിയലക്ഷ്യ ഹര്ജി നല്കിയത്.
അതിനിടെ കേസിന്റെ അന്തിമവാദം തുറന്ന കോടതിയില് വേണമെന്ന ആവശ്യവുമായി അതിജീവിത വിചാരണ കോടതിയില് ഹര്ജി സമര്പ്പിച്ചു. അടച്ചിട്ട കോടതിയിലെ വാദം അവസാനിപ്പിക്കണമെന്നാണ് ഹര്ജിയിലെ ആവശ്യം. അന്തിമവാദം തുടങ്ങിയതിന് പിന്നാലെയാണ് ഈ ആവശ്യവുമായി അതിജീവിത വിചാരണക്കോടതിയെ സമീപിച്ചിരിക്കുന്നത്. മെമ്മറി കാര്ഡ് നിയമവിരുദ്ധമായി പരിശോധിച്ച സംഭവത്തില് നേരത്തെ അതിജീവിത കോടതിയില് അവിശ്വാസം രേഖപ്പെടുത്തിയിരുന്നു.